- Vi ynsker å legge til rette for fleire visningar av scenekunst laga av frie grupper, seier kulturminister Thorhild Widvey i ei av pressemeldingane på departementets heimesider.

I pressemeldinga heiter det at  Black Box Teater, B.I.T. Teatergarasjen og Teaterhuset Avant Garden vert styrka i det nye budsjettframlegget. Regjeringen vil også styrke Dramatikkens hus. I tal er det snakk om svært små summar:  Auken i tilskota til desse institusjonane er på til saman 2 millionar kroner. Ein halv million kroner som påslag til Nordic Black Theatre er også lagt inn i framlegget. I pressemeldinga vert det også sagt at basisfinansieringa for dei frie scenekunstgrupper skal gjevast prioritet.

Spreie makta
Gjennom ei såkalla gåveforsterkningsordning signaliserer kulturstatsråden at det er eit ynskje å gjere det norske kulturlivet meir fritt og uavhengig.
- Vi styrker denne fridomen dersom vi spreier makta og skaper fleire finansieringskjelder, seier Widvey i pressemeldinga frå departementet.

Det framstår som uklart i kva grad dette er ei ordning som vil kome teaterlivet til gode.

Spenninga er no knytt til kva slags mottaking dette budsjettframlegget får i kulturlivet, og ikkje minst på Stortinget. Og så vil det truleg først bli klart neste år kva slags retning den nye regjeringa gjev kulturfeltet.