Del artikkelen |

Emilia Clarke, fødd 1. mai 1987 i London, England. Skodespelar i teater og film. Ho vart uteksaminert frå Drama Centre London i 2009.

Emilia Clarke. Juli 2013. Foto: Gage Skidmore. WikiCommons

I tida ved Drama Centre School i London spelte Clarke mellom anna Rosencrantz i Hamlet, Anna i Gogol sitt skodespel Revisoren,  Raymonde i Ei fluge i øyret hennar (A Flea in Her Ear) av Georges Feydeau, Besse i Awake and Sing, Orsina i Emilia Galotti, Isabelle i The Changeling og Eliza Doolittle i Pygmalion av George Bernhard Shaw.

Clarke har spelt Beate i framsynga Sense for the Company of Angels Theatre. I 2013 spelte ho rolla som Holly Golightly i ein sceneversjon av Truman Capote sin roman Breakfast at Tiffany's ved Cort Theatre.

Far til Emilia Clarke var lydteknikar for teater. Interessa hennar for teater vart vekt då jenta var tre år, skal vi tru Wikipedia. Ho såg framsyninga Show Boat der faren arbeidde. Emilia gjekk på skule ved St. Edward's School i Oxford frå 2000 til 2005 og vidare på den uavhengige katolske jenteskulen Rye St Antony School i same by, fram til ho byrja på Drama Centre London.

For norsk publikum er Clarke mest kjend i rolla som Daenerys Targaryen i HBO-serien Game of Thrones (2011-2014).