Del artikkelen |

Fullt namn Zoe Yadira Saldaña Nazario, født 19. juni 1978 i Passaic, New Jersey, USA. Skodespelar i teater og film, dansar.

Zoe Saldaña. Mars 2010. Foto: Sgt. Michael Connors. WikiCommons

Saldaña har røter i den Dominikanske republikken og har også budd der saman med mor si frå ho var ni år. Saldaña meistrar både amerikansk og spansk språk og er stolt og sjølvmedveten over den latinske kulturarven sin. Medan ho budde i den dominikanske republikken vakna interessa for dans, og ho vart etterkvart teken opp på the ECOS Espacio de Danza Academy der ho studerte ballett, jazz, og moderne latinsk dans.

Etter dette vende familien attende til Queens i New York der Saldaña hadde budd i barndommen. Her vart ho i 1995 med i the FACES theater group i Brooklyn, som retta seg mot ungdom og deira utfordringar. Ho vart vidare med i the New York Youth Theater. Spelet hennar i teatret sin produksjon Joseph and the Technicolor Dreamcoat gjorde at ho vart fanga opp av eit talentbyrå. Danse- og teatererfaringa hennar førte vidare til at ho fekk den første filmrolla si, som ballettdansaren Eva i filmen Center Stage (2000).

Saldaña har medverka i ei rad filmar, som til dømes Pirates of the Caribbean: The Curse of the Black Pearl (2003) og Terminalen (2004). For eit norsk publikum er ho mest kjend som Nyota Uhura i Star Trek (2009 og 2013), Neytiri i Avatar (2009) og Cataleya Restrepo i Colombiana (2011).