- EIT EUROPEISK MIRAKEL

- Jon Fosse er eit europeisk mirakel, seier Berit Gullberg, leiar for det svenske teaterforlaget Columbine i eit intervju med Dagens Nyheter. Ho meiner at nordmennene ligg langt framme med sin dramatikk, og undrar seg litt over at det ikkje fins eit eige norsk teaterforlag. Sjølv har ho hatt Fosse i stallen sidan 1995.

I Sverige vert det skrive meir dramatikk enn nokon gong før, skriv Dagens Nyheter. Dei som før skreiv poesi for skrivebordsskuffen skriv no teaterstykke som dei sender inn til teatra. Berre Dramaten får inn rundt 1000 manus i året, og det svenske Radioteatret eitt stykke kvar einaste dag.

I 1993 stifta Berit Gullberg teaterforlaget Columbine. Namnet kjenner nok mange frå den italienske Commedia dell'Arte, den frodige kvinnelege zanni. Idag har Gullberg omlag 200 forfattarnamn på lista si, og rundt 1000 titlar.
- Å vere teaterforleggar er Sveriges mest ukjende kulturgjerning, seier ho til Dagens Nyheter. - Eg har vanskar med å forklare kva eg gjer, sjølv til venene mine. Det burde kanskje heller heite teateragentur.

Pressesjef på Dramaten
Ho har sjølv eit forfattarskap bak seg: To romanar, ei novellesamling, ei diktsamling og ein antologi om skodespelarkunst.

Gullberg tek seg av dramatikarane sine, les dei nye stykka, diskuterer og kommenterer dei. Ho har 20 år bak seg som pressesjef ved Dramaten, og kjenner dei fleste som tel i den svenske teaterverda. Og det var tre dramatikarar som ba henne om å starte eit forlag.

Stort behov for dialog
- Det fins få stader for kunstnarlege diskusjonar utanfor teatra. Dei fleste frilansregissørar har ingen sjansar til å kome inn på teatra og vere med på samtalane der, seier ho til Dagens Nyheter. - Samstundes vitnar all den nyskrivne dramatikken om at behovet for dialog er stort, mellom forfattarar, skodespelarar og publikum.

Ho er prosess-orientert i møte med forfattarane:
- Av og til kjem nokon med eit gåverikt manuskript som ikkje er ferdig. Då kan vi seie: Kom attende, vi fylgjer skrivinga di, vi trur at du kan utvikle deg, fortel Gullberg.

Dramatisk kvalitet
Og av og til er det berre litt hjelp som skal til for at eit stykke skal bli ferdig. Elles har Gullberg klare kjennemerke på kva som er dramatisk kvalitet, eit bra språk, ein livfull dialog, eit emne som kjennes viktig. Kvalitet merkar ein direkte, meiner ho.

- Det går veldig fort å kome inn i eit bra teaterstykke, seier ho til Dagens Nyheter. - Etter ti sider veit du: Dette her held mål! Før hadde vi ein tommelfingerregel om at det berre var naudsynt å lese dei ti første og dei ti siste sidene, pluss litt i midten for å avgjere det. Men på Columbine får alle stykke ein skikkeleg sjanse.

Relatert link:
Hon får pjäs och publik att mötas Av Ingegärd Waaranperä. Dagens Nyheter, 3. januar 2001


NYHETER  MELDINGER

Teaternett formidler nyheter fra norsk og internasjonalt teater. Hjelp oss å være oppdatert! Skjer det noe der du er - send oss et tips! Vår epostadresse:  teaternett@teaternett.no